شفق:
شهفهق/ دویای وهڕێهوبردن کۆنسێرت سهمفۆنیای روومی له شار تۆرێنتۆ، سهرۆک وهزیرهیل کهنهدا ئیستیفان
هارپێر، وه پێشکهشکردن تابلۆی فهخری، رێز له گورانیچڕ ناودار کورد شههرام نازری گرد.
لهی بارهو موزیکزان جوان کورد حافز نازری و کوڕ هونهرمهند ناودار کورد شههرام نازری له دیدارێگ تایبهت وه ئاژانس پهیامنێر وت "ئهرا پێشکهش کردن یهکیگ له بهشهیل پرۆژهی سهمفۆنیای روومی، وهل مامۆستا شههرام نازری و گرووپێگ له ناودارترین ژهنیارهیل موزیک له وڵاتهیل جووراوجوور جههان، سهردان شار تۆرێنتۆی کهنهدا کردیم و له هۆڵ "سۆنی سێنێتر" کۆنسێرتێگ سازکردیم ک له بهرنامهگه وهزیر باڵای کابینهی کهنهدا وه نوێنهرایهتی له ئیستیفان هارپێر سهرۆک وهزیرهیل کهنهدا، تابلۆی فهخری پێشکهش وه هونهرمهند شههرام نازری کرد".
ههمیش وت "ئهی کۆنسێرته له هۆڵ گهورا و شکۆدار و ناودار سۆنی سێنێتر وهڕێهوچوی، و شههرام نازری و گرووپهگهی لهشوون 12 ساڵ کۆنسێرت له کهنهدا سازکردن، ههر وهیخاتره گشت بلیتهیل کۆنسێرتهگه وه زویترین وهخت تهواو بوین و مهردمان ئیرانی و بیگانه و ههمیش وهرپرسهیل باڵای سیاسی، فهرههنگی و کومهڵایهتی کهنهدا، لهوانه: وهزیر باڵای کابینهی کهنهدا له لایهن ئیستیفان هارپێر سهرۆک وهزیرهیل کهنهدا، نوێنهر شاری ریچمۆند هیل پێشوازی خاسیگ له کۆنسێرتهگه کردن و نزیکهی 4 ههزار کهس بهرنامهگه له نزیکهو دین".
حافز سهبارهت وه پارچه موزیک و گورانییهیل کۆنسێرتهگه وت: لهی کۆنسێرته چهنهها پارچه موزیک و گورانی له موزیک ئیرانی وه ئاوازدانهری خوهم و شههرام نازری له شعرهیل مهولانا پێشکهش کریا".
ئهوهیش خسته روی "لهڕاسی کۆنسێرت نهوای ئاشتی ئیران دویایین بهرنامه له پرۆژهی سهمفۆنیای روومییه وهرجله بڵاوهوبوین سی دییهگهی ک بڕیاره له لایهن کۆمپانیای ناودار سۆنی له کووتایی ساڵ 2011 بکهفێده بازاڕ".
موزیکزان جوان کرماشانی حافز نازری له کووتایی ئهی دیداره سهبارهت وه تایبهتمهندی ئهی کۆنسێرته ئاشکرایهوکرد "بهشداری ژهنیارهیل وهرچهو موزیک کلاسیک جههان و یهکهمین بهرنامهی موزیک ئیرانی له هۆڵی سۆنی سێنێتر" یهکیگه له خاڵهیل وهرچهو کۆنسێرتهگه".
ئاماژه ئهرا ئهوهیشکرد "ئهی کۆنسێرته له سێ بهش جیاواز موزیک ئهرای دابهشکریاس و دیدیگ نووه وه موزیک و ئاواز ئیرانی ک وهباوهڕ من ئهزموونیگ نووه و ئومیدوارم مهیل گووشتهکنهیل له سهرتاسهر جههان ئهرا لای خوهی بکیشێ".
ئهندامهیل گرووپ موزیکی کۆنسێرت "نهوای ئاشتی ئیران"، بریتی بوین له: شههرام نازری ـ ئاوازدانهر و گورانیچڕ، حافز نازری ـ ئاوازدانهر، ژهنیار سێتار و هاوخوهن، موزیکزان جوان کورد ههژار (حوسێن) زههاوی ـ ژهنیار دهف و ئامێرهیل کوتریاگ، مێت هایمۆویتز Matt Haimovitz ـ ژهنیار چهلۆ، گۆڵن وێلز Glen Velez ـ ژهنیار ئامێرهیل کوتریاگ، یوسف شرانیک ـ ژهنیار ئامێرهیل کوتریاگ و پاوڵ نێئۆباور Paul Neoubaour ـ ژهنیار ڤێۆڵۆن ئاڵتۆ.
